Според најновата временска прогноза, денешниот ден ќе биде претежно сончев и многу топол низ целата земја, со мала до умерена облачност. Иако времето во најголемиот дел од денот ќе биде стабилно, метеоролозите предупредуваат дека во попладневните часови атмосферата ќе стане понестабилна, што на одделни места може да донесе краткотраен дожд, грмежи и засилен ветер.
Температурите ќе се движат од 29 до 37 степени, а во повеќето градови ќе преовладува чувство на силна летна жештина. Ваквите временски услови значат дека во најтоплиот дел од денот се препорачува избегнување подолг престој на директно сонце, како и внесување доволно течности, особено кај повозрасните лица, децата и хронично болните.
Во Скопје ќе преовладува сончево и многу топло време со мала до умерена облачност. Во попладневните часови ќе има услови за локална нестабилност со можност за изолирани врнежи и грмежи, додека максималната дневна температура ќе достигне околу 35 степени.
За време на викендот и во првите денови од следната работна седмица, земјава ќе биде под влијание на исклучително топла воздушна маса. Тоа ќе донесе стабилно, суво и пеколно топло време, при што температурите речиси насекаде ќе бидат над 30 степени. Во најтоплите делови од државата живата во термометарот ќе се искачи и до 39 степени, што ќе биде меѓу највисоките вредности во овој период.
Сепак, ваквата топлотна епизода нема да трае долго. Иако и вторник ќе биде многу топол, синоптичарите најавуваат постепено зголемување на облачноста, што ќе создаде услови за појава на пороен дожд, грмежи и локално невреме.
Во среда се очекува промена на временските услови со благо намалување на температурите. Покрај освежувањето, времето ќе стане значително понестабилно, со почеста појава на поројни врнежи, грмежи и електрични празнења во повеќе делови од државата. Поради можноста за локални невремиња, граѓаните се советуваат внимателно да ги следат временските прогнози и да преземат мерки за заштита од високите температури и евентуалните попладневни временски непогоди.
