Удар од гром предизвикал пожар во атарот на селото Макреш, во општина Старо Нагоричане, при што огнената стихија зафати површина од околу 15 хектари. Информацијата ја потврдија од Регионалниот центар за управување со кризи (РЦУК) и Територијалната противпожарна единица (ТППЕ) Старо Нагоричане.
Според првичните информации, во пожарот изгореле стрништа, сува трева и нискостеблеста шума, а пламените јазици брзо се ширеле поради сувата вегетација на теренот.
Во гаснењето на пожарот биле ангажирани две противпожарни возила и шест пожарникари од ТППЕ Старо Нагоричане, а во акцијата активно помогнале и двајца жители од селото. Благодарение на нивната навремена и координирана интервенција, огнената стихија била ставена под контрола пред да предизвика уште поголеми штети.
Интервенцијата започнала во 15:10 часот и траела речиси пет часа, сè до 19:55 часот, кога пожарот бил целосно изгаснат.
Од Територијалната противпожарна единица информираат дека пожарот е целосно ликвидиран и дека во моментов не постои опасност од негово повторно активирање. Надлежните апелираат граѓаните да бидат внимателни во овој период на високи температури и зголемен ризик од пожари, бидејќи и природните појави, како што се ударите од гром, можат да предизвикаат сериозни последици.
