Премиерот Христијан Мицкоски денеска одговори на новинарско прашање во врска со протестот на Сојузот на синдикати, истакнувајќи дека секој граѓанин има право на протест.
„Минималната плата согласно закон ќе биде зголемена во месец март, односно со платите во април за март. Секоја одлука која ќе произлезе од бипартитниот дијалог ќе биде поддржана од нас“, рече Мицкоски.
Министерот за економија, Бесар Дурмиши, неодамна потврди дека минималната плата со редовното мартовско усогласување ќе се зголеми за 1.500 до 2.000 денари.
Оваа година се очекува и раст на пензиите, бидејќи просечната плата природно ќе се зголемува. Министерката за финансии, Гордана Димитриеска – Кочоска, објасни дека согласно сегашните пресметки, во март пензиите би можеле да пораснат за околу 1.000 денари, додека за септември Владата ќе одлучи дали зголемувањето ќе биде линеарно.
