Пратеникот на ВМРО-ДПМНЕ, Бојан Стојаноски, изјави дека власта внимателно пристапува кон рестрикциите предвидени со новиот закон за заштита од пушење и дека треба да се бара решение кое ќе ги земе предвид ставовите на различните засегнати страни.
Во гостување во емисијата „360 степени“, Стојаноски посочи дека во моментов се чека дополнително експертско и правно мислење за дел од поднесените амандмани.
Според него, дел од пратениците во Комисијата за здравство се медицински професионалци и побарале дополнителни правни толкувања пред да продолжи расправата.
Стојаноски најави дека дискусијата ќе продолжи откако ќе бидат прибрани потребните мислења.
Тој оцени дека основната идеја на законското решение е добра и најави дека ќе го поддржи, но смета дека треба да се остави простор и за дополнителни предлози што би можеле да го подобрат текстот.
Според Стојаноски, доколку засегнати страни имаат аргументирани забелешки, вреди тие да бидат разгледани и преку дијалог да се бара компромис.
Предлог-законот за заштита од употребата на производи од тутун и сродни производи Владата го усвои на 2 јуни 2026 година, по што беше испратен во Собранието. Неговото разгледување подоцна беше закочено поради поднесени амандмани, меѓу кои и предлози што се однесуваат на можноста за посебни простории за пушење. Министерството за здравство претходно се изјасни против законско воведување такви простории.
Стојаноски порача дека конечната верзија на законот треба да произлезе од разговор во кој ќе бидат земени предвид различните ставови, а собраниската процедура ќе продолжи по добивањето на дополнителните експертски мислења.
