Убави и емотивни моменти деновиве се бележат во Општата болница во Кочани. За само два дена, на Гинеколошко-акушерското одделение по природен пат на свет дошле седум бебиња – четири машки и три женски.
Информацијата ја сподели директорката на Општа болница Кочани, Катерина Мирчовска, која посочи дека станува збор за уште една убава вест за болницата и за целиот кочански регион.
Особено радува фактот што сите седум породувања биле извршени по природен пат. Од болницата велат дека кочанското породилиште и понатаму е место каде секојдневно се испишуваат најубавите животни приказни, со првиот плач на новороденчињата и радоста што тие ја носат во семејствата.
Од оваа година, во кочанската болница работат тројца специјалисти по гинекологија и акушерство, што дополнително придонесува за создавање услови за квалитетна здравствена грижа за идните мајки и нивните бебиња.
Од болницата се надеваат дека позитивниот тренд ќе продолжи и во периодот што следува, со уште повеќе породувања и уште повеќе бебешки плач што ќе се слуша низ кочанското породилиште.
Седум бебиња за само два дена – седум нови причини за радост и седум семејства кои го добија најубавиот подарок.
