Скопје денеска одбележува 63 години од катастрофалниот земјотрес што го погоди градот на 26 јули 1963 година, при што животот го загубија 1.070 лица, а околу 3.000 беа повредени. Разорниот потрес остави траен белег во историјата на главниот град и засекогаш го промени неговиот изглед.
По повод годишнината, во 10 часот делегација на Собранието, составена од пратениците Сергеј Попов и Даниела Николова, ќе положи венец со цвеќе пред Споменикот на жртвите од катастрофалниот земјотрес на гробиштата во Бутел. Цвеќе ќе положат и претставници на Град Скопје во рамки на централното комеморативно одбележување.
Во вечерните часови, во Музејот на град Скопје ќе бидат организирани две изложби посветени на трагичниот настан. Во 19:30 часот ќе биде отворена изложбата „63 години – Скопје '63“, авторско дело на Зоја Богдановска, која преку архивски фотографии и сведоштва ги прикажува првите часови по земјотресот, спасувачките акции и личните приказни на преживеаните.
Еден час подоцна ќе биде отворена и изложбата „Архив на тага: Скопје 1963“, која содржи досега необјавени фотографии на Васил Хаџиманов, посветени на погребните и тажачките обреди по катастрофата. Воедно ќе биде промовирано и дополнетото двојазично издание на книгата „Тажачки песни од скопскиот земјотрес во 1963 г.“, подготвено од Ана Мартиноска и Жарко Иванов.
Со овие настани, Скопје уште еднаш им оддава почит на жртвите и потсетува на трагедијата која останува еден од најзначајните и најтажните моменти во историјата на градот.
