Македонија и денес ќе биде под влијание на стабилно, сончево и исклучително топло време. Во текот на денот ќе има мала локална облачност, а ќе дува слаб до умерен ветер од променлив правец.
Утринските температури ќе се движат меѓу 10 и 20 степени, додека дневните ќе бидат многу високи и ќе достигнат од 33 до 40 степени, што значи дека во повеќе делови од земјата ќе продолжат тропските горештини.
Во главниот град Скопје времето исто така ќе биде сончево и многу топло. Ќе дува слаб променлив ветер, а температурите ќе се движат од минимални 17 степени во утринските часови до максимални 38 степени во текот на денот.
Според прогнозите, периодот на стабилно и суво време ќе продолжи и во наредните денови. Во одредени региони дневната температура повторно ќе надмине 40 степени, што значи дека топлотниот бран ќе продолжи да создава непријатни услови, особено во попладневните часови.
Сепак, кон крајот на неделата се очекува промена. Од четврток па сè до крајот на седмицата, во попладневните часови ќе има услови за локален развој на нестабилна облачност, која на поединечни места може да донесе краткотраен пороен дожд и грмежи. Иако врнежите нема да бидат распространети низ целата земја, тие ќе донесат краткотрајно освежување во дел од регионите по неколкудневниот период со екстремно високи температури.
