Голем пожар избувна денеска попладне над тунелот на патот кон граничниот премин Блаце, што предизвика хаос и целосна блокада на сообраќајот. Возачи сведочат за густи облаци чад и пламени јазици кои се ширеле над патот, предизвикувајќи паника меѓу патниците.
Според информации од Центарот за управување со кризи (ЦУК), пожарот се проширил со голема брзина поради сувата трева и силниот ветер. На терен веднаш биле испратени екипи од Бригадата за противпожарна заштита, додека МВР ангажираше и хеликоптерска поддршка за да се спречи огнот да стигне до тунелската структура и електричната инсталација.
„Пожарот се движи по висока трава и ниско дрвје, а има потенцијал да се прошири и кон околните населени места ако не се стави под контрола“, велат од ЦУК.
За среќа, засега нема информации за повредени лица, но штетите се сè уште непроценети. Сообраќајот кон граничниот премин Блаце беше во прекин неколку часа, а полицијата ги пренасочуваше возилата кон алтернативни патишта.
Ситуацијата е ставена под контрола, но дежурните служби остануваат на терен со зголемена готовност, бидејќи опасноста од нови жаришта сè уште не е помината. Властите апелираат граѓаните да не се движат во ризични подрачја и да пријават секој забележан пламен или чад.
