Од полноќ, односно од 3 ноември, возачите во Македонија ќе плаќаат повисоки цени за бензините и дизелот. Регулаторната комисија за енергетика (РКЕ) донесе одлука за зголемување на малопродажните цени, при што бензините поскапуваат за два денари за литар, а дизел-горивото за еден денар.
Просечното зголемување на малопродажните цени на нафтените деривати изнесува 1,55 отсто.
Според новата одлука на РКЕ, највисоката цена на ЕУРОСУПЕР БС-95 ќе изнесува 93 денари за литар, додека ЕУРОСУПЕР БС-98 ќе се продава по максимална цена од 95 денари за литар.
Новата цена на ЕУРОДИЗЕЛ ќе биде 100 денари за литар, што претставува зголемување за еден денар во однос на досегашната цена.
Кај другите нафтени деривати има различни промени. Цената на екстралесното масло за домаќинство останува непроменета и ќе изнесува 110 денари за литар.
Мазутот, пак, поскапува за 1,30 денари за килограм, па неговата нова цена ќе достигне 55,573 денари.
Од Регулаторната комисија за енергетика објаснуваат дека при утврдувањето на новите цени биле земени предвид движењата на референтните цени на нафтените деривати на светските пазари, како и промените на курсот на денарот во однос на американскиот долар.
Во пресметката дополнително биле применети и владините мерки, односно намалениот ДДВ за дизел-горивото и пониските акцизи за бензините и дизелот.
Од РКЕ појаснуваат дека станува збор за максимални малопродажни цени. Тоа значи дека бензинските пумпи имаат можност да ги продаваат горивата и по пониски цени од оние утврдени со одлуката на Комисијата.
