Советот на Град Скопје едногласно усвои заклучок со кој ќе се измени Програмата за повластен паркинг и ќе се прошири за две категории кои досега неправедно беа изоставени – лицата со аутистичен спектар и со Даунов синдром.
Амандманите ги поднесе советничката група на Левица, која четири години бара измена на оваа Програма. Координаторката Катерина Јовановска посочи дека семејствата со деца од овие категории веќе се соочуваат со големи трошоци за третмани, дефектолози и услуги кои Фондот не ги покрива, па паркингот станува дополнителен удар врз нивниот буџет.
Иако Градот првично одби, по деталното образложение на Јовановска, Советот едногласно донесе заклучок за измена на Програмата – што значи дека лицата со аутизам и Даунов синдром ќе добијат бесплатен, односно повластен паркинг.
Новата мерка ќе важи и за лица со попреченост кои не живеат во Скопје, но редовно доаѓаат во градот за лекување.
