Советот на Општина Велес го прифати новиот ценовник за услугите на јавните паркиралишта во градот, со кој се утврдуваат цените за паркирање во трите зони – А, Б и Ц. Возачите ќе плаќаат од 20 до 40 денари за започнат час, а предвидени се и различни видови дозволи за резиденти, деловни корисници и вработени во институции.
На последната седница, советниците го прифатиле предложениот ценовник што претходно го донел Управниот одбор на Јавното претпријатие „Парк-Спорт и Паркинзи“ – Велес.
Според утврдените цени, паркирањето во зона А ќе чини 40 денари, во зона Б 30 денари, додека во зона Ц цената ќе изнесува 20 денари. Истите суми ќе се наплаќаат и за секој нареден започнат час.
Предвиден е и толерантен период од 10 минути, во кој нема да се наплаќа паркирањето. Од плаќање на паркинг-услугата ќе бидат ослободени лицата со попреченост.
Во кои часови ќе се наплаќа паркирањето?
Времето во кое ќе важи наплатата ќе зависи од сезоната. Во зимскиот период, од понеделник до сабота, паркирањето ќе се наплаќа од 7 до 21 часот.
Во летниот период наплатата ќе започнува во 7 часот наутро и ќе трае до 23 часот.
Во недела и за време на државните празници паркирањето ќе биде бесплатно.
Ценовникот предвидува и можност за користење дневна паркинг-услуга, чија цена ќе изнесува 500 денари.
Колку ќе чинат резидентните дозволи?
Со новиот ценовник се воведува и резидентна паркинг-дозвола за граѓаните кои живеат во зоните со организирано паркирање. Цената ќе зависи од тоа дали станува збор за прво или второ возило во домаќинството, како и од периодот за кој се издава дозволата.
За прво возило цените ќе бидат:
- Еден месец – 300 денари.
- Три месеци – 800 денари.
- Шест месеци – 1.500 денари.
- Дванаесет месеци – 3.000 денари.
За второ возило ќе важат повисоки цени:
- Еден месец – 500 денари.
- Три месеци – 1.400 денари.
- Шест месеци – 2.600 денари.
- Дванаесет месеци – 5.000 денари.
Деловните паркинг-дозволи со различни цени по зони
Предвидена е и деловна паркинг-дозвола, чија цена ќе зависи од зоната во која се користи паркинг-местото и времетраењето на дозволата.
За зона А, цените ќе изнесуваат:
- Еден месец – 3.000 денари.
- Три месеци – 8.500 денари.
- Шест месеци – 16.000 денари.
- Дванаесет месеци – 30.000 денари.
За зона Б:
- Еден месец – 2.200 денари.
- Три месеци – 6.200 денари.
- Шест месеци – 11.800 денари.
- Дванаесет месеци – 22.000 денари.
Во зона Ц цените ќе бидат најниски, односно ќе изнесуваат половина од тарифите утврдени за зона А.
Посебна паркинг-дозвола ќе можат да користат и вработените во институциите. За нив е предвидена цена од 300 денари за еден месец, 800 денари за три месеци, 1.500 денари за шест месеци и 3.000 денари за период од 12 месеци.
Претплатнички дозволи и за физички и за правни лица
Новиот ценовник предвидува и претплатнички дозволи по зона, наменети и за физички и за правни лица.
Дополнително, ќе може да се користи и годишна претплатничка дозвола за сите зони. За физичко лице таа ќе чини 35.000 денари за едно возило, додека за правно лице цената ќе изнесува 45.000 денари за едно возило.
И покрај тоа што Советот на Општина Велес го прифатил новиот ценовник, засега сè уште не е утврден точниот датум од кој ќе започне наплатата на паркирањето според новите правила.
