Министерството за внатрешни работи доби 33 нови полициски мотоцикли и комплетна заштитна опрема наменета за припадниците на сообраќајната полиција.
Мотоциклите се обезбедени од Републичкиот совет за безбедност на сообраќајот на патиштата, а на официјалното примопредавање присуствуваа министерот за внатрешни работи Панче Тошковски и претседателот на РСБСП, Горан Ангеловски.
Станува збор за 33 мотоцикли „Piaggio Beverly 310 HPE“ во полициска изведба.
Заедно со нив се обезбедени и 33 комплети мотоциклистичка опрема, составени од заштитни кациги, јакни, панталони, чизми, како и летни и зимски ракавици.
Вкупната вредност на набавката изнесува 16.845.561 денари.
Според МВР, новата опрема треба да овозможи поголема мобилност на полициските службеници, поефикасно регулирање и контрола на сообраќајот, како и подобри услови за нивната работа.
Тошковски истакна дека набавката е дел од пошироките активности за модернизација на сообраќајната полиција и подобрување на безбедноста на патиштата.
Тој посочи дека инвестициите во опрема и технологии се надоврзуваат и на системот „Безбеден град“, со цел поефикасно спроведување на сообраќајните правила.
Претседателот на РСБСП, Горан Ангеловски, нагласи дека Советот и годинава издвојува средства за опремување на организациските единици на МВР задолжени за контрола и регулирање на сообраќајот.
Според него, новите мотоцикли треба дополнително да ги зајакнат капацитетите на сообраќајната полиција.
Од МВР и РСБСП најавија продолжување на соработката преку нови инвестиции, превентивни активности и проекти насочени кон подобрување на сообраќајната безбедност.
Крајната цел, како што беше посочено, е намалување на бројот на сообраќајни незгоди, повредени и загинати лица на патиштата.
