Септември е период кога пазарите се преполни со зрели пиперки, а во многу домови започнува подготовката на зимницата. Но, ако сакате добар ајвар, вкусни полнети пиперки или сочен сатараш, изборот на пиперката може да направи голема разлика.
Иако на прв поглед многу сорти изгледаат слично, тие се разликуваат по меснатоста, количината на вода, сладоста и аромата.
За ајвар – рога, Куртовска капија или Амфора
За добар ајвар најважно е пиперката да биде месеста, слатка и да содржи помалку вода. Така полесно се добива густ и кремаст ајвар, без предолго испарување на течноста.
Меѓу најдобрите избори се црвената рога, односно шилја, Куртовската капија и Амфората.
Куртовската капија е особено популарна за ајвар поради издолжениот плод, месестата структура и слаткиот вкус. Кога е целосно зрела има интензивна црвена боја.
Амфората е покрупна и месеста, добро поднесува печење и има доволно „месо“ за богат и густ ајвар.
Црвената рога е поуниверзална – освен за ајвар, може да се користи за печење, салати и сатараш.
За полнење – бабура
Кога станува збор за полнети пиперки, еден од најпрактичните избори е средно големата бабура.
Таа има доволно широк внатрешен простор за филот, а истовремено е доволно цврста за да го задржи обликот при готвењето.
И бојата има значење. Зелените бабури имаат поизразен и благо горчлив вкус, додека црвените, жолтите и портокаловите се послатки.
За традиционален вкус најчесто се избира зелена бабура, додека зрелите пиперки се добра опција ако сакате поблага и послатка варијанта.
За сатараш – сочна бабура или шилја
Кај сатарашот важи поинакво правило. Тука е пожелно пиперката да биде посочна, бидејќи течноста што ја испушта при готвењето заедно со доматите и кромидот станува дел од основата на јадењето.
Може да се користат и бабура и шилја. Црвените пиперки ќе дадат повеќе природна сладост, додека зелените ќе внесат посвеж и поизразен вкус.
Добар избор е и комбинацијата од неколку различни пиперки.
Како да изберете добра пиперка?
Без разлика што подготвувате, барајте цврсти, здрави и неоштетени плодови, без омекнати места или знаци на расипување.
За ајвар особено се важни целосната зрелост, интензивната црвена боја и меснатоста на плодот.
Затоа, кога следниот пат ќе купувате пиперки, не гледајте само на цената:
За ајвар – рога, Куртовска капија или Амфора. За полнење – средно голема бабура. За сатараш – сочна бабура или шилја.
Правилниот избор на пиперката може да биде токму она што ќе ја направи разликата меѓу просечна зимница и оној препознатлив домашен вкус.
