Македонија денес одбележува 35 години од историскиот 8 Септември 1991 година, денот кога граѓаните со огромно мнозинство ја изразија својата волја за суверена и самостојна македонска држава.
Осми септември е еден од најсветлите датуми во поновата македонска историја – ден на гордост, државност и потсетување на генерациите кои верувале во идејата Македонија самостојно да ја гради својата иднина.
Пред точно три и пол децении, граѓаните излегоа на историскиот референдум и одговорија на прашањето дали се за суверена и самостојна држава Македонија. Повеќе од 95 проценти од граѓаните кои гласаа се изјаснија „ЗА“, со што беше испратена јасна порака за иднината на државата.
Истата вечер, илјадници граѓани се собраа на плоштадот во Скопје за да го прослават историскиот резултат. Пред насобраниот народ се обратија првиот претседател Киро Глигоров, првиот премиер Никола Кљусев и првиот претседател на Собранието Стојан Андов.
Следуваше создавањето и зацврстувањето на институциите на независната држава и нејзиното етаблирање како самостоен субјект на меѓународната сцена.
Триесет и пет години подоцна, 8 Септември останува симбол на македонската државност, слободата и стремежот на граѓаните сами да ја определуваат својата иднина.
Македонија во изминатите децении помина низ бројни предизвици, кризи и историски пресврти, но продолжи да опстојува и да се развива како независна држава. Денешниот празник е можност да се оддаде почит на сите генерации кои придонеле за нејзиното создавање, развој и зачувување.
Осми септември е и потсетник дека државата се гради секој ден – со работа, единство, меѓусебна почит и одговорност кон идните генерации.
На денешниот ден, македонското знаме гордо се вее во чест на 35 години независност, а пораката останува иста како и пред три и пол децении – да се чува државата и да се гради Македонија во која идните генерации ќе сакаат да живеат, создаваат и останат.
Нека ни е честит 8 Септември – Денот на независноста!
Среќен 35-ти роденден, Македонијо! 🇲🇰
