Системот „Безбеден град“ од почетокот на неговото функционирање регистрирал 310.865 сообраќајни прекршоци, покажуваат најновите податоци што ги објави Министерството за внатрешни работи.
Статистиката се однесува на периодот од 2 февруари до 20 август 2026 година, а убедливо најголемиот број прекршоци се поврзани со пречекорување на дозволената брзина.
Од вкупниот број евидентирани прекршоци, дури 301.835 се за управување возило со брзина поголема од дозволената. Тоа значи дека брзото возење учествува со повеќе од 97 проценти во сите прекршоци регистрирани преку системот.
Особено внимание привлекуваат и податоците за автомобилите со странски регистарски ознаки.
Од почетокот на функционирањето на „Безбеден град“ кај возила со странски таблички се регистрирани вкупно 180.378 прекршоци.
Само во периодот од 19 до 20 август, системот евидентирал уште 5.514 прекршоци направени од возила со странски регистарски ознаки.
Од МВР повторно апелираат до сите учесници во сообраќајот да ги почитуваат сообраќајните правила и прописи и со одговорно однесување да придонесат за поголема безбедност на патиштата.
