ХПВ вакцинацијата не треба да се поврзува исклучиво со девојчињата, бидејќи и момчињата можат да развијат заболувања поврзани со хуманиот папилома вирус, истакна проф. д-р Александра Грозданова во гостувањето во „Ноќно студио“ на 4ТВ.
Таа нагласи дека е особено важна правилната едукација на родителите, бидејќи дел од нив се прашуваат зошто вакцината се препорачува на возраст од околу 12 години, кога детето сè уште не е сексуално активно.
Според Грозданова, токму во тоа е суштината на превенцијата – имунитетот треба да се создаде пред евентуалната изложеност на вирусот.
Таа посочи дека ХПВ може да биде поврзан со повеќе видови карциноми и кај мажите, меѓу кои го спомена и орофарингеалниот карцином.
За разлика од дел од гинеколошките заболувања, кои можат да се следат преку редовни превентивни прегледи, кај одредени ХПВ-поврзани заболувања кај мажите откривањето може да биде потешко и подоцнежно, објасни Грозданова.
Како пример за успешна вакцинациска политика ја посочи Австралија, каде со години се вакцинираат и момчиња и девојчиња.
Според неа, и во Македонија во текот на 2025 и 2026 година се забележува позитивен тренд и зголемен интерес за ХПВ вакцинацијата, што го поврза со поголемата едукација и советување на населението.
Грозданова најави и дека се разгледува можноста за проширување на возрасната граница за примање на ХПВ вакцината.
Во разговорот беше спомената можност вакцинацијата да биде достапна и до 26-годишна возраст.
Таа, сепак, нагласи дека станува збор за насока што се разгледува за во иднина, а не за веќе воведена промена.
Главната порака, според Грозданова, е дека ХПВ вакцинацијата е превентивна мерка и за девојчињата и за момчињата, со цел заштитата да се создаде пред потенцијален контакт со вирусот.
