Словенечкиот кошаркар и една од најголемите ѕвезди на НБА-лигата, Лука Дончиќ, проговори за тешкиот период низ кој поминувал по разделбата со својата долгогодишна партнерка Анамарија Голтес. Во емотивно интервју за американскиот магазин „Спортс илустрејтед“, Дончиќ откри дека четири месеци не ги видел своите две ќерки, што оставило сериозни последици врз неговиот приватен живот.
Иако на кошаркарскиот терен продолжил да биде една од најголемите ѕвезди, надвор од него се соочувал со семејни проблеми за кои јавноста дотогаш знаела малку.
Сè започнало во декември минатата година, кога Дончиќ отпатувал во родната Словенија поради раѓањето на неговата втора ќерка, Оливија.
За време на престојот во Љубљана, тој побарал од тогашната свршеница Анамарија Голтес нивната постара ќерка, двегодишната Габриела, да отпатува со него во Соединетите Американски Држави.
Меѓутоа, според пишувањата на американските медиуми, меѓу партнерите дошло до вербална расправија, а по заминувањето на кошаркарот била повикана и полиција во породилиштето во Крањ.
Дончиќ потоа се вратил во Америка и им се приклучил на Лос Анџелес Лејкерс, но своите ќерки повторно ги видел дури во април.
Во разговорот за „Спортс илустрејтед“, словенечкиот репрезентативец призна дека разделеноста од децата му ја направила претходната сезона исклучително тешка.
Тој открил дека во текот на сезоната поминал само четири или пет дена со своите ќерки, иако неговата најголема желба била секојдневно да биде покрај нив.
Особено емотивен бил моментот кога новинарот го прашал дали очекува семејната ситуација наскоро да се разреши.
Дончиќ одговорил дека се надева на позитивен исход, но дека сè уште не знае како ќе се развиваат работите.
„Не можам да поминам уште една ваква сезона“, порачал кошаркарот, јасно покажувајќи колку тешко му паѓа одвоеноста од децата.
Да потсетиме, Дончиќ и Анамарија Голтес ја прекинаа својата долгогодишна врска, од која имаат две ќерки.
Двајцата се запознале уште како тинејџери, а во 2023 година се свршија. Нивниот однос со години привлекуваше внимание во јавноста, особено откако Дончиќ стана една од најголемите светски кошаркарски ѕвезди.
По разделбата, нивните меѓусебни односи и прашањата поврзани со децата станаа тема на бројни медиумски написи.
Иако Дончиќ се подготвува за новите предизвици во дресот на Лејкерс, неговото последно интервју покажува дека семејната ситуација останува едно од најважните прашања во неговиот живот.
