Голема меѓународна полициска операција резултираше со разбивање на криминална мрежа која со години организирала шверц на огромни количества кокаин од Латинска Америка кон европските земји. Во рамки на повеќегодишната истрага биле запленети повеќе од 43 тони дрога, додека последната акција завршила со апсење на 20 осомничени лица.
Операцијата, спроведена под кодното име „Кантабрија“, била организирана од Европол во соработка со надлежните институции на Шпанија и Еквадор.
На 8 октомври 2026 година, полициските сили спровеле координирани активности во Еквадор, при што биле уапсени 20 лица и извршени претреси на вкупно 23 локации.
Според информациите од истрагата, криминалната организација со години користела разработен систем за транспорт на кокаин преку меѓународната поморска трговија.
Еквадор бил една од главните појдовни точки за шверцот, а дрогата се транспортирала кон Европа скриена во контејнери со тропско овошје.
Криминалците користеле легални компании за увоз и извоз на овошје како покритие за незаконските активности. Во пратките со банани, наменети за европските пристаништа, биле сокривани стотици килограми, па дури и тони кокаин.
Истрагата покажала дека организацијата располагала со разгранета меѓународна инфраструктура, со оперативни бази во Перу и логистички центри во Белгија, Шпанија и Холандија.
Дополнително, биле откриени финансиски и оперативни врски со лица во Обединетите Арапски Емирати.
Во текот на повеќегодишната истрага, преку 13 големи операции спроведени од 2022 до 2026 година, биле конфискувани повеќе од 43 тони кокаин.
Значаен дел од доказите биле обезбедени благодарение на дешифрирањето на комуникациите преку апликацијата Sky ECC, која ја користеле припадници на криминалните структури.
Меѓу најголемите заплени поврзани со истрагата се издвојуваат речиси четири тони кокаин пресретнати во Холандија во декември 2020 година, како и рекордната заплена на 13 тони дрога во Шпанија.
Европскиот комесар за внатрешни работи и миграција, Магнус Брунер, истакнал дека ваквите акции ја потврдуваат важноста на меѓународната полициска соработка.
Тој нагласил дека криминалните организации функционираат преку државните граници, поради што и борбата против нив мора да биде заедничка и координирана.
Според Брунер, со заплената на огромните количества кокаин и разбивањето на шверцерската рута е нанесен сериозен удар врз организираниот криминал, а секоја спречена пратка придонесува за поголема безбедност на европските граѓани.
