Инвестиција од 5 милиони денари за поголема безбедност и поквалитетен живот на граѓаните
Градоначалникот на Општина Кавадарци, Митко Јанчев, заедно со претседателот на Советот на Општината, д-р Стојанчо Рамов, и стручните служби од Локалната самоуправа, извршија увид во успешно завршените градежни активности за реконструкција на улицата „Задругарска“.
Овој инфраструктурен проект опфати темелна подготовка на подлогата со постелица од тампон од дробен камен, со што се осигурија сите стандарди за долготрајност и квалитет на патот. Веднаш по подготовката, извршено е комплетно асфалтирање на коловозот во вкупна должина од 250 метри и ширина од 6 метри.
Подобрени услови за сите учесници во сообраќајот
Со реализацијата на овој зафат, значително се подобруваат условите за движење на возилата и пешаците, а истовремено се подигнува и нивото на безбедност за сите учесници во сообраќајот во овој дел од градот.
Вкупната вредност на овој проект изнесува 5 милиони денари, средства обезбедени од буџетот и наменети за континуирано унапредување на локалната патна мрежа. Локалната самоуправа продолжува со реализација на капитални инвестиции кои директно влијаат на подобрување на секојдневието и квалитетот на живот на сите жители на Кавадарци.
