Министерот за здравство Сашо Клековски, по повод 35 години од независноста на Македонија, беше дел од владината делегација која оддаде почит на истакнати државници кои оставија значаен белег во создавањето и развојот на современата македонска држава.
По покана на претседателката Гордана Сиљановска-Давкова, Клековски, заедно со министерката за образование и наука Весна Јаневска и министерот за надворешни работи Тимчо Муцунски, положи свежо цвеќе на вечните почивалишта на првиот претседател Киро Глигоров, претседателот Борис Трајковски и првиот претседател на Владата Никола Кљусев.
Клековски истакна дека станува збор за тројца луѓе со различни животни и политички патишта, но обединети во одговорноста да ја водат државата во нејзините први и најтешки години.
„Триесет и пет години подоцна, вистинската почит кон нив не се цвеќето и говорите, туку работата – секој на своето место, за држава во која вреди да се остане“, порача Клековски.
Со оваа порака, министерот го одбележа Денот на независноста, нагласувајќи ја важноста на одговорноста, посветеноста и секојдневната работа во интерес на државата и нејзините граѓани.
