Министерот за здравство Сашо Клековски се обрати на отворањето на Осмиот конгрес по фармација во Охрид, на кој, според објавените информации, учествуваат повеќе од 2.500 учесници од 20 земји.
Во своето обраќање Клековски се осврна на повеќе промени што Министерството ги подготвува во областа на фармацијата и политиката за лекови.
Тој најави нов Закон за лекови усогласен со европските стандарди, како и нов Закон за медицински средства, кој најпрво треба да биде ставен на јавна расправа, а потоа да влезе во законска процедура. Паралелно се ревидира и Правилникот за Позитивната листа.
Клековски потсети и на неодамнешното ажурирање на Листата на есенцијални лекови по повеќе од една деценија, како и на додавањето нови лекови на Позитивната листа.
Меѓу најавените промени е и воведувањето на е-рецептот, процес за кој министерот посочи дека лично го координира и кој, според најавата, треба да биде реализиран до крајот на март 2027 година. Тој најави и поширока стратегија за дигитализација во здравството.
Како посебен приоритет Клековски ја посочи борбата против фалсификуваните лекови, нагласувајќи дека во оваа област мора да има нулта толеранција.
Во делот на финансирањето и рационалната употреба на терапијата, министерот зборуваше и за ревизија на нерационалното препишување лекови и за можноста плаќањето на терапијата повеќе да се поврзува со реалниот клинички исход.
Клековски отвори и прашање за проширување на улогата на фармацевтите во примарната здравствена заштита, посочувајќи дека аптеките се меѓу најдостапните точки на здравствениот систем за граѓаните.
„Фармацевтот е најдостапниот здравствен работник. Граѓаните влегуваат во аптека почесто отколку кај лекар. Тој потенцијал досега не го користевме доволно“, порача Клековски.
Тој им се заблагодари на фармацевтите за нивната стручност, критичките согледувања и секојдневната работа во здравствениот систем.
