Неуспешниот обид за погубување на 50-годишната Криста Пајк предизвика силни реакции во американската сојузна држава Тенеси, откако таа останала жива и по примената на две дози пентобарбитал. По прекинот на постапката била пренесена во болница, каде според нејзините адвокати се наоѓа во критична состојба и добива медицинска помош.
Пајк требаше да стане првата жена погубена во Тенеси по повеќе од 200 години. Погубувањето било закажано за 30 септември, но по повеќечасовни правни постапки започнало дури вечерта.
Според сведочењата од комората и судските поднесоци на нејзината одбрана, биле применети две дози од лекот, но таа продолжила да дише. Новинарите присутни на погубувањето опишале дека Пајк давала знаци на живот и долго по започнувањето на процедурата.
Од Одделот за корекции на Тенеси соопштија дека бил испочитуван секој чекор од официјално утврдениот протокол и дека тој не предвидувал дополнителни процедури над оние што веќе биле спроведени. Причината зошто погубувањето не успеало сè уште не е утврдена.
Гувернерот на Тенеси, Бил Ли, нареди сеопфатна независна ревизија за да се утврди што точно се случило. Воедно, преостанатото погубување планирано во државата за 2026 година е откажано.
Ова е втор неуспешен обид за погубување во Тенеси во текот на 2026 година. Претходно, во мај, не било извршено погубувањето на Тони Карутерс поради проблеми при процедурата.
Пајк била осудена на смрт за убиството на 19-годишната Колин Слемер во 1995 година, кога Пајк имала 18 години. Таа не ја оспорува својата улога во злосторството, додека нејзините адвокати во постапките за помилување укажувале на нејзината историја на злоупотреба и проблеми со менталното здравје. Гувернерот претходно го одбил барањето за помилување.
Случајот сега отвора нови правни и медицински прашања околу начинот на кој Тенеси ја спроведува смртната казна, додека независната ревизија треба да покаже зошто двете дози не довеле до исходот предвиден со протоколот.
