Државниот санитарен и здравствен инспекторат издаде привремена забрана за вршење на дејност на кетеринг-фирмата „Рустика“ и на мензата во компанијата „Микросам“ во Прилеп, по случајот со сомневање за труење со храна кај вработени.
Забраната е изречена усно, на записник, и ќе остане на сила сè додека не пристигнат негативни резултати од лабораториските анализи на земените примероци, како и до спроведување на препорачаните противепидемиски мерки.
Инспекцискиот надзор бил спроведен од повеќе институции, меѓу кои ДСЗИ, Центарот за јавно здравје Прилеп, Институтот за јавно здравје и Агенцијата за храна и ветеринарство. Контролите биле извршени на две локации – во објектот на кетеринг-фирмата и во фабричката менза.
Од надлежните институции информираат дека по пријави за симптоми на труење кај вработени, првично кај 17 лица бил активиран националниот протокол за постапување при сомневање за масовни интоксикации, по што бројот на засегнати се зголемил.
Според податоците од Центарот за јавно здравје Прилеп, симптоми на труење пријавиле вкупно 41 вработен од 61 кои консумирале оброк во првата смена. Сите имале средна клиничка слика и биле пуштени на домашно лекување, без хоспитализирани случаи.
Од инспекторатот посочуваат дека при надзорот не биле утврдени санитарно-технички и хигиенски недостатоци, а конечната причина за инцидентот ќе се утврди по добивање на лабораториските резултати.
