По критиките на Спасен Силјаноски за изборот на музички гости на Тиквешкиот гроздобер, кавадаречкиот градоначалник Митко Јанчев го повика пејачот да се појави во Општина Кавадарци и да даде конкретни одговори: каде би се вклопил во програмата и колку публика може да донесе.
Јанчев нагласува дека Тиквешкиот гроздобер не е локална забава, туку голема балканска манифестација која привлекува десетици илјади гости од Македонија и соседните земји. Тој потсетува дека сите локални и домашни музички гости се максимално почитувани, а големата сцена секоја година привлекува ѕвезди како српската евровизиска победничка Марија Шерифовиќ, чии настапи собираат најмалку 50.000 посетители.
„Гроздоберот не е само забава, туку и економски значаен настан. Поголемиот број гости значи поголеми придобивки за нашите граѓани. Затоа, го повикувам Спасен да дојде и да одговори на прашањата што јавно ги поставив“, истакна Јанчев, потенцирајќи дека не е достојно да се потценуваат традиционалните ѕвезди со евтини популистички изјави.
