Претседателот на САД, Доналд Трамп, денес изјави дека милијардерот Џорџ Сорос и неговиот син Алекс би можеле да бидат обвинети за корупција според федералниот Закон RICO за организиран криминал и рекет, без да понуди конкретни докази за таквите тврдења.
Трамп на својата платформа Truth Social напиша дека Сорос и неговиот „радикален левичар“ син се вмешани во поддршка на насилни протести во САД и ги предупреди да бидат внимателни.
Фондацијата „Отворено општество“, која Џорџ Сорос ја предаде на својот син Алекс во 2023 година, ги отфрли обвинувањата како „скандалозни и лажни“. Портпаролот нагласи дека фондацијата промовира човекови права, правда и демократски принципи и не финансира насилни протести.
Алекс Сорос, кој ја презеде управата над империјата од 25 милијарди долари, изјави дека е „пополитички настроен“ од својот татко и планира да продолжи да донира средства на левичарски политички иницијативи.
