Американскиот претседател Доналд Трамп испрати уште два воени брода кон Венецуела, само една недела откако претходно испрати три, како дел од акција против наркокартелите. Крстосувачката ракета USS Erie и нуклеарната подморница USS Newport News се очекува да стигнат следната недела. Венецуела се обрати до ОН со барање за итно запирање на распоредувањето на американските сили во Карибите.
Трамп ја обвини владата на Николас Мадуро за трговија со кокаин и соработка со наркокартели. Поради тоа, САД објавија потерница за Мадуро, нудејќи награда од 50 милиони долари за негово апсење, оценувајќи го како „еден од најголемите трговци на дрога во светот“.
Минатата недела кон Венецуела беа испратени три воени брода со 4.500 војници, но Мадуро ги одби обвинувањата и го обвини Вашингтон за обид за соборување на власта. Тој најави мобилизација на милиони граѓани за да се спротивстават на американските закани, додека министерот за одбрана, Владимир Падрино, најави засилени поморски патроли и распоредување на дронови.
Администрацијата на Трамп го обвинува Мадуро дека ја води кокаинската организација Cartel de los Soles, класифицирана како терористичка група. За апсење или кривична одговорност се нуди и 25 милиони долари награда за венецуелскиот министер за внатрешни работи, Диосдадо Кабело. Мадуро, од своја страна, тврди дека Венецуела е „слободна од производство на кокаин“ и го критикува Вашингтон за неактивност кон картелите во САД.
Американските закани веќе предизвикуваат движења во Венецуела – властите испратија 15.000 војници на границата со Колумбија и открија бродоградилишта каде криминалците планирале производство на подморници и бродови за транспорт на дрога. Венецуела во писмо до ОН осуди „ескалација на непријателските акции“ и оцени дека распоредувањето на американските бродови и нуклеарната подморница претставува „сериозна закана за регионалниот мир и безбедност“.
И покрај воената мобилизација, аналитичарите ја минимизираат можноста за директна американска инвазија. Сепак, Трамп веќе потпишал тајна директива со која се овозможува употреба на воена сила против наркокартелите во Латинска Америка. Портпаролката на Белата куќа, Каролин Левит, истакна дека Трамп е подготвен да користи „сите елементи на американската моќ“ за да го запре ширењето на дрогата и да ги казни виновниците.
Во Мексико, ова предизвика страв и мобилизација на 10.000 војници на границата, откако меѓународните наркокартели беа прогласени за терористички организации во американска уредба.
