Македонската полиција се подготвува за значајна технолошка модернизација, со која полициските службеници што работат на терен постепено ќе добиваат телесни камери, по примерот на американската полиција.
Според информациите што ги објави „Слободен печат“, Министерството за внатрешни работи склучило петгодишен договор со американската компанија „Аксон“, специјализирана за производство на опрема и технолошки решенија за полициските служби.
Новите боди-камери, за кои се наведува дека користат и технологии поврзани со вештачка интелигенција, ќе бидат составен дел од полициската униформа.
Нивната набавка и испорака ќе се реализираат постепено во наредните пет години, а првите камери се очекува да започнат да се користат кон средината на 2027 година.
Според објавените информации, целта е со текот на времето сите полициски службеници кои извршуваат теренски задачи да бидат опремени со вакви уреди.
Интересно е што договорот, според медиумските информации, не е достапен на интернет-страницата на Бирото за јавни набавки.
Се наведува дека станува збор за директно склучен договор со американската компанија, поради специфичноста на софистицираната опрема.
Компанијата „Аксон“ веќе има искуство со испорака на ваква технологија во Македонија.
Имено, според објавените информации, таа претходно добила договор од американскиот Стејт департмент за обезбедување телесни камери како дел од безбедносниот систем на Амбасадата на САД во Скопје.
Воведувањето боди-камери претставува важен чекор кон дигитализацијата на полициското работење, со потенцијал за подобро документирање на интервенциите и поголема транспарентност.
Засега не се објавени детали за вкупната вредност на договорот, бројот на камерите и конкретните функции на вештачката интелигенција што ќе се користат.
