Вчера попладне, нешто пред 19 часот, во центарот на Гостивар се одигра сцена како од акционен филм. Според информациите од МВР, четворица маскирани напаѓачи, вооружени со автоматско оружје, извршиле дрзок грабеж во златара лоцирана во близина на малиот пазар во градот.
Според пријавата на В.П. од Гостивар, разбојниците упаднале во златарата и со закана по живот ограбиле голема количина злато и накит, по што побегнале со патничко возило марка „БМВ“ без регистарски таблички.
Полицијата веднаш започнала акција за нивно пронаоѓање, но разбојниците, за да го отежнат движењето на полициските патроли, фрлале бодликави жици на неколку локации низ центарот на Гостивар, блокирајќи повеќе улици.
Според неофицијални извори, џипот што бил користен при грабежот бил пронајден подоцна целосно запален на патот кон планинскиот премин Стража, на свртувањето за Маврово. Возилото било целосно зафатено од пламен, а истражителите веруваат дека сторителите го запалиле намерно, за да ги уништат трагите и доказите поврзани со грабежот.
Во моментов, Секторот за внатрешни работи Тетово презема интензивни мерки за идентификација и апсење на разбојниците. На терен се прегледуваат снимки од безбедносни камери и се собираат траги што би можеле да го водат истражниот тим до сторителите.
Жителите на Гостивар се шокирани од дрскоста на нападот, кој според првичните информации бил прецизно испланиран и изведен со воена прецизност. Властите најавуваат дека случајот ќе биде третиран со највисок приоритет, додека јавноста очекува брз епилог и апсење на сторителите кои ја потресоа целата јавност.
