Инцидент со возило кое користело туѓи регистарски таблички е регистриран на автопатот од Градско кон Скопје, откако возачот избегал по сообраќајна несреќа, а во автомобилот биле пронајдени 12 мигранти.
Според информациите од МВР, на 17.06.2026 околу 19:47 часот во СВР Скопје било пријавено дека патничко возило „мерцедес“ се движело по автопатот со регистарски ознаки кои не припаѓале на возилото.
Полициските службеници се обиделе да го запрат возилото, но возачот не застанал на даден знак за запирање. При движењето, на клучката кај Миладиновци, возилото се свртело и продолжило по земјен пат кон селото Блаце во општина Петровец.
Таму автомобилот удрил во дрво, по што возачот веднаш го напуштил местото на настанот и побегнал во непознат правец.
По извршено пребарување на теренот, полициските екипи го пронашле возилото, а во него биле затекнати 12 мигранти. Според првичните информации, пет од нив се државјани на Египет, а останатите потекнуваат од Турција.
Мигрантите биле згрижени и сместени во транзитниот центар во Табановце, каде што се спроведуваат понатамошни процедури.
Од полицијата информираат дека се преземаат мерки за пронаоѓање на возачот и целосно расчистување на случајот.
