Владата на Република Македонија, на предлог на министерот за здравство Сашо Клековски, го именуваше д-р Димитар Ангелевски за нов директор на Државниот санитарен и здравствен инспекторат (ДСЗИ).
Д-р Ангелевски е доктор по општа медицина, дипломиран на Медицинскиот факултет при Универзитетот „Св. Кирил и Методиј“ во Скопје, и специјалист по ортопедија. Своето работно искуство го има градено во ЈЗУ Здравствен дом – Скопје, во рамките на Службата за итна медицинска помош. Во досегашната кариера ја извршувал и функцијата директор на Медицинскиот симулациски центар, а важи и за признат едукатор за обуки од областа на итната медицина.
Според најавите од ресорното министерство, пред ДСЗИ во наредниот период стојат јасни очекувања насочени кон:
- Посилна улога во заштитата на јавното здравје, преку побрза и повидлива инспекција на терен;
- Доследна примена на законските прописи и воспоставување еднакви правила за сите;
- Поголема отчетност и транспарентност во работењето на институцијата.
По повод кадровската промена, министерот Клековски упати благодарност до досегашниот директор, д-р Кирил Лазов, за неговиот досегашен ангажман и раководењето со Инспекторатот, а на новоименуваниот директор д-р Ангелевски му посака многу успех во извршувањето на новата функција.


