Имунизацијата со БСЖ вакцина во Македонија е привремено одложена додека надлежните институции ги проверуваат сериите што се користат во земјава, по информациите за несакани реакции регистрирани во Хрватска.
Одлуката ја донесе Комисијата за имунизација на 6 октомври и, според здравствените власти, станува збор за превентивна мерка, а не за потврда дека вакцината предизвикала компликации кај деца во Македонија.
Проверките започнаа по информациите за четири случаи на остеомиелитис – воспаление на коските – кај деца во Хрватска, кои временски се поврзуваат со примена на БСЖ вакцина од производител чии вакцини се користат и во Македонија.
Комисијата за имунизација побарала од МАЛМЕД детални информации за сериите што се наоѓаат во земјава, нивниот квалитет и евентуалната поврзаност со несакани реакции.
Директорката на Клиниката за респираторни заболувања кај деца „Козле“, Катерина Бошковска, посочува дека во установата во изминатите дваесет години не бил регистриран случај на остеомиелит како последица од БСЖ вакцинацијата.
Според неа, оваа компликација е исклучително ретка и може да се појави подолг период по вакцинацијата.
Родителите треба да обрнат внимание на појава на оток или болка во коските, особено на рацете и нозете. Ваквите реакции, според Бошковска, можат да се појават од неколку месеци до повеќе од две години по вакцинацијата, а најчесто меѓу 12 и 16 месеци.
За бебињата на кои вакцинацијата им е одложена, препораката е родителите да ги следат официјалните насоки на здравствените власти за дополнително примање на вакцината.
Според објавените информации, Министерството за здравство во меѓувреме презема активности и за набавка на БСЖ вакцина од друг производител од Јапонија.
Од Министерството нагласуваат дека вакцинацијата против туберкулоза останува задолжителна.
Во „Козле“ во текот на 2026 година биле регистрирани 12 нови случаи на туберкулоза, во споредба со 15 случаи во 2025 година.
Според официјалните информации, во изминатите десет години МАЛМЕД добил само една пријава за сомнение за несакана реакција од БСЖ вакцина во Македонија.
Случајот бил пријавен во август 2022 година и се однесувал на апсцес на местото на апликација, реакција која е наведена и во информациите за употреба на вакцината.
Привременото одложување ќе трае додека не бидат добиени комплетните информации за сериите и нивната безбедност, по што надлежните ќе одлучат кога ќе продолжи редовната имунизација.
