Двајца мажи завршија во 30-дневен притвор поради брутален напад врз сопственик на гостилница во Куманово, кој се случил по полноќ откако сопственикот им одбил влез во веќе затворениот објект.
Инцидентот се случил на 18 јануари околу 1 часот по полноќ, кога осомничените се обиделе насилно да влезат во кафаната со намера да консумираат алкохол по работното време. Кога сопственикот им рекол дека објектот е затворен, ситуацијата ескалирала.
Според информациите од Основното јавно обвинителство Куманово, двајцата напаѓачи продолжиле со насилство во дворот на објектот, удирајќи го сопственикот повеќепати по главата и телото. Го собориле на земја, предизвикувајќи тешки телесни повреди, меѓу кои скршеница на десната рака и повреда на увото.
Основното јавно обвинителство поднесе истражна постапка за кривично дело „насилство“ против двајцата осомничени, а судот им одреди притвор во траење од 30 дена по предлог на јавниот обвинител.
