Во последните два месеца, пазарот на сурова нафта се карактеризира со голема нестабилност. По наглите зголемувања на цените кон крајот на јули, во првите денови од август се забележа остар пад, по што следуваше блага корекција нагоре.
Аналитичарите велат дека е тешко да се предвиди со сигурност движењето на цените, но во моментов главните прогнози укажуваат на стабилизирање и постепен пад на цените во следната година.
- Goldman Sachs прогнозира цена од 64 долари по барел за 2025 година и 56 долари за 2026.
- JP Morgan очекува 66 долари за 2025 и 58 долари за 2026 година.
- Американската администрација за енергетика предвидува цена под 70 долари по барел за 2025, со пад на 58 долари во 2026.
Нашите локални анализи, според Марио Ѓорѓиев, се во согласност со овие трендови и укажуваат на можен пад на цената на нафтата во наредниот период.
Кои се факторите што ќе влијаат?
- Зголемување на производството од страна на ОПЕК ПЛУС, особено поради стабилизирање на економијата и повисока побарувачка од транспортниот сектор.
- Негативни фактори како слаба побарувачка и ризик од економско забавување во големите потрошувачки земји (Кина, САД).
- Геополитички притисоци, како американските напори да се намали увозот на руска нафта преку Индија, што може да создаде промени во побарувачката.
- Воведувањето нови царини од САД, што би можело да го забави растот на нивната економија и да го намали барањето за нафта.
Што значи ова за нас?
Пониските цени на суровата нафта би можеле да резултираат со поевтин бензин и дизел, што ќе ги намали трошоците за гориво и транспорт. Ова пак може да има позитивно влијание врз економијата преку намалување на оперативните трошоци за компании и граѓани.
Сепак, поради нестабилноста на пазарот и геополитичките ризици, се уште постои можност за изненадувања и краткорочни скокови на цените.
Доколку се задржи трендот на намалување на цените, можно е во следните месеци да возиме со поевтин бензин и дизел, но ќе мораме да внимаваме на глобалните случувања кои можат брзо да ги променат овие проекции.
