ПРВ.мк
Македонија

АЛАРМАНТНО НА ПАТИШТАТА: Деветмина лишени од слобода, меѓу нив возачи без дозвола - еве колку под дејство на алкохол!

АЛАРМАНТНО НА ПАТИШТАТА: Деветмина лишени од слобода, меѓу нив возачи без дозвола - еве колку под дејство на алкохол!

Дури девет возачи биле лишени од слобода во текот на изминатото деноноќие на различни локации низ државата поради безобѕирно управување со моторно возило. Меѓу нив, петмина возеле без положен возачки испит, двајца биле под дејство на алкохол, двајца имале активна забрана за управување, а еден возел со поголема брзина од дозволената.

Од Министерството за внатрешни работи информираат дека сите девет лица се лишени од слобода поради сомнение за сторено кривично дело „Безобѕирно управување со моторно возило“, согласно член 297-а од Кривичниот законик.

Петмина од возачите управувале возило без положен возачки испит. Станува збор за И.И. (19) од Скопје, В.М. (24) од селото Арачиново, Д.В. (34) од Неготино, С.С. (34) од Битола и В.Ѓ. (39) од селото Долни Липовиќ, општина Конче.

Особено загрижувачки е податокот дека В.Ѓ. од Долни Липовиќ, покрај тоа што немал положен возачки испит, управувал и под дејство на алкохол. Кај него биле измерени 1,15 промили алкохол во крвта.

Под дејство на алкохол возел и Д.В. (28) од Велес, кај кого алкотестот покажал дури 1,53 промили алкохол во крвта.

Дополнително, А.Б. (44) од селото Црвевци, кичевско, и М.Ј. (22) од селото Песочани, охридско, управувале возила и покрај тоа што имале активна забрана за управување.

Деветтиот возач, А.Ф. (40) од селото Голема Речица, тетовско, бил лишен од слобода затоа што управувал возило со брзина поголема од дозволената.

Од МВР најавуваат дека по целосното документирање на случаите ќе бидат поднесени соодветни кривични пријави.

Од полицијата упатуваат апел до сите учесници во сообраќајот да ги почитуваат правилата и прописите, да не седнуваат зад волан без положен возачки испит, под дејство на алкохол или додека имаат активна забрана за управување, со цел заеднички да придонесат за поголема безбедност на патиштата.

Најнови вести