Утре православните верници го одбележуваат споменот на Света Злата Мегленска, светителка и маченичка од времето на турското владеење во Македонија. Родена и пострадала во Слатина, Мегленско, таа е позната по својата силна вера, чисто срце и необична убавина.
Нејзината убавина го привлекла вниманието на Турчин кој се обидел да ја натера да се потурчи и да ја земе за жена, но света Злата останала непоколеблива и се заколнала на верност кон Христос. По месеци затвор и сурово мачење, таа херојски ги издржала страдањата и на крајот била обесена, а телото ѝ било исечено на парчиња. Дел од нејзиното тело христијаните кришум ги погребале.
Житието на света Злата е запишано во 1799 година од очевидецот Никодим Светогорец, а според други извори, сведок на нејзиното страдање бил и духовникот Тимотеј. Таа маченички настрадала во 1795 година, оставајќи наследство на вера и храброст кое се одбележува и денес.
