Македонија би можела да се соочи со периоди на многу студено време и обилни снежни врнежи во текот на претстојната зима, иако првичните сезонски анализи укажуваат дека зимата во просек би можела да биде поблага.
Метеорологот Славчо Попоски објави првична анализа за зимската сезона 2026/2027 година, нагласувајќи дека конечната и подетална прогноза ќе ја претстави во декември.
Според него, иако се очекува силен Ел Нињо, неговото влијание врз временските услови во Македонија не е толку изразено како во одредени делови на Европа.
Попоски објаснува дека поблага зима не значи дека земјата ќе биде поштедена од сериозни студени бранови.
Напротив, постои можност во текот на зимските месеци кон Балканот да продрат многу студени, па дури и екстремно студени воздушни маси од Арктикот.
Кога ваквиот воздух ќе стигне до Средоземјето, може да придонесе за формирање циклонски системи кои би донеле обилни снежни врнежи и во Македонија.
Сепак, метеорологот нагласува дека во текот на зимата ќе има и периоди со температури повисоки од просечните.
Тој предупредува дека сезонските прогнози засега се различни и дека не може со сигурност да се утврди колку снег ќе падне и кога ќе настапат најстудените денови.
Подеталната анализа за претстојната зима ќе биде објавена во декември.
