Министерството за здравство официјално ја започна вакцинацијата против сезонскиот грип, а интересот меѓу граѓаните е исклучително голем. Според најновите податоци, повеќе од 60.000 лица веќе се пријавиле, а над 8.000 граѓани се вакцинирани низ државата во првите денови од кампањата.
Вакцинацијата се одвива на 35 вакцинални пунктови низ целата земја, од кои пет се наоѓаат во Скопје, а сите заинтересирани можат да се пријават преку веб-страницата vakcinacija.mk или преку својот матичен лекар.
„Со бесплатната вакцинација се опфатени ризичните категории граѓани – повозрасни лица над 65 години, лица со хронични заболувања, здравствени работници, бремени жени, деца на возраст од шест месеци до пет години, како и лицата сместени во установи за социјална заштита и нивните вработени“, информираат од Министерството за здравство.
Посебно внимание е посветено на граѓаните кои не можат да излезат од своите домови. За нив, превентивни тимови од здравствени установи започнаа со теренска вакцинација, при што вакцината се дава во домашни услови на повозрасни, неподвижни и лица со попреченост.
Со оваа мерка, Министерството има за цел да го олесни пристапот до здравствена заштита и да го зголеми опфатот на ризичните категории население во текот на есенскиот период, кога вирусите на грип традиционално се најактивни.
Не дознавај последен - читај ПРВ.мк
