Камерите од проектот „Безбеден град“ за само пет месеци регистрирале околу 120.000 сообраќајни прекршоци, покажуваат податоците што денеска ги соопшти министерот за внатрешни работи Панче Тошковски на отчет за работата на МВР.
Според неговите изјави, дури 95 проценти од сите регистрирани прекршоци се однесуваат на пречекорување на дозволената брзина. Системот почнал со примена од 1 февруари 2026 година, а во истиот период е забележано и значително намалување на сообраќајните несреќи.
Тошковски истакна дека бројот на несреќи е намален за околу 40 проценти, при што во овој период загинале 34 лица, наспроти 55 во истиот период минатата година. Според него, ова претставува јасен показател за ефектот од новиот систем за автоматска контрола на сообраќајот.
Камерите на „Безбеден град“ се поставени во Скопје, Куманово и Тетово, како и на главните коридори 8 и 10. Од МВР најавуваат дека до крајот на годината системот ќе биде проширен и ќе ја покрие целата држава, вклучувајќи ги сите поголеми градови и клучни патни правци.
Покрај сообраќајната безбедност, Тошковски се осврна и на состојбата со криминалот, наведувајќи дека е забележано најниско ниво во последните 20 години, со зголемена ефикасност на полицијата и поголем број откриени криминални групи и сторители.
