Собранието обезбеди 2 милиони денари (околу 32.000 евра) за изработка на идејно решение и започнување активности за изградба на спомен-обележје во Кочани, во чест на младите кои го загубија животот во трагедијата во дискотеката „Пулс“. Информацијата на социјалните мрежи ја објави пратеникот од ВМРО-ДПМНЕ, Миле Лефков.
Оваа иницијатива е координирана со родителите на настраданите и претставува заедничка желба да се преточи дел од болката во достоинствен спомен и да се зачува сеќавањето на трагедијата.
Споменикот ќе биде поставен во централното градско подрачје како тивок сведок на болката и силна порака за солидарност и обврска да не дозволиме ваква трагедија никогаш повеќе да се повтори, истакна Лефков.
Тој упати благодарност до Владата што го прифати амандманот и до пратениците што ја поддржаа оваа иницијатива.
