Во последното деноноќие на територијата на земјава биле регистрирани вкупно 20 пожари на отворен простор, информира Центарот за управување со кризи.
Според состојбата до 07:30 часот на 20 септември, нема активни пожари. Еден пожар е ставен под контрола, додека останатите 19 целосно се изгаснати.
Пожарот кој сè уште е под контрола се наоѓа на подрачјето меѓу општините Македонски Брод и Сопиште. Огнот избувнал во близина на селото Белица, во месноста „Кајорец“, а потоа се проширил во правец кон Јасен. Зафатена е нискостеблеста и мешана шума.
Во изминатите 24 часа пожари биле пријавени и во Куманово, Битола, Струга, Чешиново-Облешево, Ново Село, Струмица, Долнени, Прилеп, Кривогаштани, Илинден, Крушево, Ресен, Липково, Ѓорче Петров и Тетово.
Најголем дел од пожарите зафатиле ниска вегетација, стрништа, отпад и депонии, додека во неколку случаи биле опожарени и шумски површини.
Центарот за управување со кризи повторно упатува апел до граѓаните да бидат особено внимателни и одговорни при престој и движење на отворен простор. Посебно се апелира на внимателност при користење оган, со цел да се спречи избувнување и неконтролирано ширење на пожари.
