Новозеландскиот уметник Бенџамин Лојд покажува дека понекогаш и едноставен гест може да направи огромна разлика. Наместо класични тетоважи, тој создава реалистични привремени цртежи со безбедна, нетоксична боја што лесно се отстранува со вода, а токму тие им носат радост, самодоверба и насмевки на децата кои се лекуваат во болница.
Приказната, која ја објави „Модерн мет“, започнала како мал гест за децата на неговите пријатели и роднини. Но, во 2016 година идејата прераснала во голем хуманитарен проект. Лојд тогаш објавил на Фејсбук дека ќе ја посети Детската болница „Старшип“ во Окленд ако неговата објава собере само 50 допаѓања.
Наместо очекуваните 50, објавата стана вистински хит и собра повеќе од 400.000 допаѓања. Верен на својот збор, уметникот ја посетил болницата, каде што на десетици мали пациенти им изработил уникатни привремени тетоважи, претворајќи еден тежок ден во незаборавно искуство.
Зад проектот стои и многу лична приказна. Како дете, Лојд имал лузна од изгореница на раката, поради која често се чувствувал несигурно. За да ја прикрие, самиот цртал по неа, а токму тоа искуство подоцна го инспирирало преку својата уметност да им помогне и на други деца полесно да ги прифатат своите лузни, медицински состојби или изглед.
Денес, со поддршка од болници и локални заедници, Бенџамин Лојд продолжува да ги посетува малите пациенти и да создава персонализирани привремени тетоважи, кои не само што изгледаат впечатливо, туку им помагаат на децата повторно да се почувствуваат храбри, посебни и сигурни во себе.
„Ништо не ми носи поголема радост од тоа да им ја зголемам самодовербата на децата со тетоважа направена специјално за нив. Единствениот проблем е што потоа не сакаат да се тушираат“, напишал Лојд со насмевка на социјалните мрежи.
Неговиот проект денес е препознаен ширум светот како пример дека уметноста може да биде многу повеќе од креативен израз – таа може да биде извор на надеж, охрабрување и сила за оние на кои им е најпотребна.
