Научниците од Универзитетот Стенфорд развија нова магнетна техника која ветува дека ќе им помогне на пациентите со бубрежни камења да ги избегнат болните и повторливи медицински интервенции.
Овој иновативен метод, создаден од професорот Џозеф Лиао и неговиот тим, користи магнетен гел и специјална жица за да ги собере фрагментите од разбиените камења поуспешно од досегашните ласерски или ултразвучни процедури.
Досега, традиционалните методи подразбираа разбивање на камењата со ласери или ултразвук, а потоа нивно вадење преку жичена корпа вметната во уретрата. Сепак, овие процедури често оставаат делови од камењата во бубрезите, што доведува до повторна појава на проблемот кај речиси 40% од пациентите и дополнителни оштетувања на ткивото.
Во потрага по поефикасно и помалку инвазивно решение, Лиао и неговиот тим создадоа магнетен гел кој ги обложува фрагментите од каменот и им овозможува да бидат привлечени од магнетизирана жица.
Во најновата студија, објавена во списанието Device, истражувачите тестирале на четири свињи, на кои им биле вметнати човечки фрагменти од камења во бубрезите. Резултатите биле импресивни – магнетната жица успеала да собере повеќе фрагменти одеднаш, минимизирајќи ја повредата и значително подобрувајќи ја ефикасноста.
„Тоа е како да користите стап со магнет за да соберете цели купчиња одеднаш,“ објасни Лиао за New Scientist, истакнувајќи дека методата може драстично да го намали времето на интервенција и рискот од компликации.
Според експертите, меѓу кои и Вероника Магданц од Универзитетот во Ватерло, ова откритие претставува огромен напредок во урологијата. Таа нагласува дека ниедно од животните не покажало несакани ефекти, што ја потврдува безбедноста на постапката.
„Тоа е многу добра вест – методата не е токсична и не предизвикува никаква штета,“ изјави Магданц.
Тимот на Лиао најави дека во рок од една година ќе започне клинички тестирања на луѓе, што може да отвори нова ера во лекувањето на бубрежните камења.
