Времето не може да се запре, но суперстогодишниците – оние кои живеат над 110 години – имаат посебна моќ да му пркосат на неизбежното. Една од најстарите жени во светот, Марија Брањас, која доживеала неверојатни 117 години, ги открила тајните на својот долг живот преку детално ДНК-истражување.
Научниците од Институтот за истражување на леукемија „Жозеп Карерас“ во Барселона ги анализирале примероците земени од крв, плунка, урина и столица што Брањас доброволно ги дала пред нејзината смрт во 2024 година. Резултатите покажаа дека нејзиниот геном бил исклучително „млад“, а клетките „се однесувале“ како да се многу помлади од нејзината хронолошка возраст. Ова е еден од главните фактори што ѝ овозможиле да го надмине просечниот животен век на жените во Каталонија за повеќе од 30 години.
Марија имала одлично здравје дури и во својата длабока старост – со силен имунитет, здраво срце и мозок, ниски нивоа на воспаление, како и исклучително ниски вредности на „лош“ холестерол. Цревниот микробиом и имунолошкиот систем ѝ биле слични на оние кај многу помлади луѓе.
Нивната студија открива дека долговечноста не е резултат само на гените, туку и на животниот стил. Средоземната исхрана, богата со јогурт, како и активниот ментален, социјален и физички живот, веројатно играат значајна улога.
Интересен научен факт е дека Брањас имала кратки теломери – заштитни капи на краевите од хромозомите, кои обично се поврзуваат со повисок ризик од смрт. Но, кај најстарите луѓе, тоа можеби не е точен показател за стареење, а во случајот на Брањас, ова можеби ѝ помогнало да избегне развој на рак.
Истражувачите нагласуваат дека иако ова истражување е спроведено само врз основа на една исклучителна личност, резултатите покажуваат дека екстремната старост не мора да биде проследена со лошо здравје. Тие додаваат дека суперстогодишниците поседуваат биомаркери што им овозможуваат отпорност на болести и овозможуваат продолжен животен век.
Во свет кој се соочува со сè поголем број стогодишници, овие научни сознанија нудат нови патишта за разбирање на биологијата на стареењето и можни стратегии за здрав и долг живот.
