Долгогодишното пријателство меѓу Дејвид Бекам и принцот Хари поминало низ сериозна криза, а нова книга открива детали за настаните кои наводно довеле до нивното оддалечување.
Бекам и Хари беа особено блиски во текот на 2010-тите години. Заедно се појавуваа на спортски настани, се дружеа во приватни клубови во Лондон, а Дејвид и Викторија Бекам беа и меѓу гостите на свадбата на Хари и Меган Маркл во Виндзор во 2018 година.
Сепак, според книгата „Бренд Бекам“ на авторката Алисон Бошоф, првите сериозни проблеми во нивниот однос започнале токму во 2018 година.
Бекамови тогаш отпатувале во Австралија за да му дадат поддршка на Хари за време на игрите „Инвиктус“. Според авторката, Дејвид очекувал средба со принцот, но Хари не се појавил, а двајцата наводно не се сретнале ниту еднаш во текот на целото патување.
Односите дополнително се влошиле во 2023 година, кога Хари и Меган, според медиумските извештаи, се посомневале дека информации за нивниот приватен живот стигнуваат до медиумите преку семејството Бекам. Ваквите сомневања наводно силно го налутиле поранешниот англиски фудбалер.
Сепак, Бошоф тврди дека односите денес не се целосно прекинати и ги опишува како „прилично добри“. Како еден од показателите го посочува присуството на Хари на натпревар на Интер Мајами во 2024 година.
Новите детали се објавуваат во период кога, според информациите во британските медиуми, Хари и Меган се враќаат да живеат во Велика Британија по шест години поминати во САД.
Двојката, според овие наводи, нема да се врати на официјалните кралски должности, туку ќе живее како приватно семејство. Нивниот портпарол не сакал дополнително да ги коментира информациите.
