Алкохолот не исчезнува од организмот веднаш по последната испиена чаша, а тоа е една од најчестите заблуди кај возачите. Иако многумина мислат дека по неколку часа сон се целосно трезни, алкохолот често сè уште е присутен во телото и сериозно ги нарушува способностите за безбедно управување со возило.
Истражувањата покажуваат дека голем број возачи се казнети за возење под дејство на алкохол токму во раните утрински часови, по ноќно излегување. Алкохолот влијае на концентрацијата, времето на реакција, видното поле и проценката на ризик, дури и кога лицето субјективно се чувствува „добро“.
Брзината со која организмот го разградува алкохолот не е иста кај сите. Таа зависи од повеќе фактори – телесната тежина, полот, возраста, метаболизмот, количината и видот на алкохолот, како и од тоа дали сте јаделе пред консумирањето. Важно е да се знае дека не постои начин алкохолот „побрзо да се исфрли“ – кафе, ладен туш или свеж воздух не го забрзуваат процесот.
Според препораките на британската организација за безбедност во сообраќајот „Road Respect“, за една чаша вино на организмот му се потребни околу три и пол часа за да го разгради алкохолот. Со секоја наредна чаша, тоа време значително се зголемува. Кај пивото и жестоките пијалаци времето варира, но и таму важи истото правило – повеќе пијалаци значат многу повеќе часови безбедносен ризик.
Пораката е јасна: ако сте консумирале алкохол, најбезбедната одлука е да не седнувате зад волан додека не помине доволно време. Подобро е да почекате, да користите такси или јавен превоз, отколку да ризикувате свој и туѓ живот.
