Ново истражување покажува дека сè повеќе луѓе имаат проблем да препознаат дали содржината што ја гледаат на интернет е вистинска или е создадена со помош на вештачка интелигенција.
Анкетата, спроведена од компанијата за сајбер-безбедност Malwarebytes меѓу 1.500 испитаници од Австрија, Велика Британија, Германија, Швајцарија и САД, открива дека дури 88 проценти од анкетираните сметаат дека денес е многу потешко да се разликува реална од AI-генерирана содржина.
Дополнително, 85 проценти од испитаниците изјавиле дека тешко можат да препознаат дали станува збор за вистинска комуникација или за обид за измама. Тоа претставува значително зголемување во споредба со минатата година, кога истото го сметале 66 проценти од анкетираните.
Експертите предупредуваат дека вештачката интелигенција сè почесто се користи за креирање убедливи измами, лажно претставување, имитација на гласови и изработка на пораки кои изгледаат како да доаѓаат од познати личности, компании или институции.
Истражувањето покажува и дека секој четврти испитаник во последната година добил персонализирана порака со цел да биде измамен. За разлика од порано, ваквите измами денес се многу попрецизни и потешко се препознаваат.
Особено загрижува податокот дека 84 проценти од анкетираните повеќе не сметаат дека фотографиите и видеата се сигурен доказ за автентичноста на некој настан, бидејќи современите AI алатки можат да создадат исклучително реалистични содржини.
Како последица на тоа, сè повеќе луѓе стануваат повнимателни на интернет. Голем дел од нив поретко користат социјални мрежи, бришат стари објави и избегнуваат да споделуваат лични информации или фотографии од своите семејства.
Експертите нагласуваат дека со напредокот на вештачката интелигенција, дигиталната писменост и проверката на информациите стануваат поважни од кога било, бидејќи препознавањето на вистинските содржини ќе биде сè поголем предизвик.
