Словенија се најде на второто место во Европската Унија според општото задоволство од животот, покажува најновата статистичка анализа објавена по повод Денот на Европа. Жителите постари од 16 години го оцениле својот живот со просечна оцена 7,7 од 10 – исто како и Романците, додека Финците се на врвот со 7,8. На спротивниот крај од листата се Бугарите со само 6,2.
Освен високото задоволство, Словенија бележи и силна работна активност – 78,3% од населението од 20 до 64 години е активно, што е над просекот на ЕУ. Малта е лидер со 83,6%, а Италија најслаба со 67,6%.
Кога станува збор за економијата, словенечкиот БДП по глава на жител изнесува 33.060 евра – под просекот на ЕУ (41.600), но сепак во средината на табелата. Луксембург има четирипати повисок БДП, додека Бугарија е на дното со половина од словенечкиот.
Словенија е меѓу земјите со најмал ризик од социјална маргинализација – 14,4%, додека Чешка има најниско ниво (11,3%). Бугарија повторно е најзагрозена со 30,3%.
Со околу 2,13 милиони жители, Словенија претставува само 0,5% од населението на Унијата, но резултатите покажуваат дека оваа мала земја е меѓу најзадоволните и најстабилните членки на ЕУ.
