Денес, министерот за култура и туризам Зоран Љутков учествуваше во заедничка акција предводена од заменик-претседателот на Владата и министер за животна средина и просторно планирање, Изет Меџити, во соработка со Музејот на Македонија, Националниот конзерваторски центар и Општина Чаир.
Со акцијата се уредува просторот во рамки на музејскиот комплекс, кој со години беше запуштен и се користеше како импровизиран паркинг. Сите хаварисани возила ќе бидат отстранети, просторот ќе се исчисти и ќе се стави во функција како уреден паркинг за посетителите на Музејот и Старата скопска чаршија.
Министерот Љутков истакна дека оваа мерка не само што го подобрува изгледот и функционалноста на просторот, туку и го олеснува пристапот на граѓаните до културното наследство. „Очекуваме уредениот простор да придонесе за поголема посетеност на музејот и чаршијата, како и за зајакнување на културниот туризам во нашиот град“, порача министерот.
