Инвестицискиот проект на Џеред Кушнер, зет на поранешниот американски претседател Доналд Трамп, добил официјално одобрение за реализација на албанскиот остров Сазан уште во декември 2024 година. Со преддоговор за долгорочен закуп од 99 години, на инвеститорот му е овозможен пристап до поранешната воена инфраструктура изградена во времето на режимот на Енвер Хоџа.
Станува збор за проект вреден повеќе од една милијарда долари, кој добил статус „стратешка инвестиција по посебна постапка“. Овој статус подразбира институционална поддршка од државата во процесот на издавање дозволи и подготовка на локацијата. Кушнер најави изградба на луксузен туристички комплекс, при што дел од островот, според најавите, ќе остане отворен за јавноста. Албанскиот премиер Еди Рама инвестицијата ја опиша како „оживување на пустина“, истакнувајќи дека таа ќе донесе нова туристичка динамика.
И покрај тоа, проектот предизвика сериозни реакции во јавноста. Дел од економистите и јавните аналитичари во Албанија предупредуваат на ризици од корупција и недоволна транспарентност, посочувајќи дека станува збор за отстапување на вреден јавен ресурс без јавно презентиран бизнис-план или детална студија за економска изводливост.
Контроверзиите дополнително се засилуваат поради тековните истраги на Специјалното обвинителство за борба против корупција (СПАК), кои опфаќаат повеќе инфраструктурни проекти во регионот на Валона. Меѓу нив е и аеродромот предвиден за потребите на идниот туристички комплекс. Во рамки на овие истраги, под обвинение веќе се најдоа и лица блиски до власта, вклучувајќи ја и поранешната министерка за инфраструктура Белинда Балуку.
Меѓународните медиуми, како „Блумберг“ и „Гардијан“, укажуваат дека инвестицијата може да отвори и дипломатски прашања, поради можен судир на интереси меѓу приватниот капитал и политичкото влијание на администрацијата на Трамп. Фактот што иницијативата за проектот ја предложил поранешниот специјален пратеник на САД, Ричард Гренел, се толкува како сигнал за политичка поддршка, но и како потенцијален извор на тензии со западните сојузници.
