Американскиот долар минатата недела забележа пад во однос на повеќето водечки светски валути, додека еврото зајакна благодарение на неколку клучни глобални економски и политички фактори.
Индексот на доларот — кој ја мери вредноста на американската валута во однос на кошничка од шест главни валути — се намали за 0,3 проценти, достигнувајќи 98,54 поени. Во однос на еврото, доларот ослабе за исто толку, со што курсот на еврото порасна на 1,1655 долари. Доларот забележа пад и во однос на јапонскиот јен, спуштајќи се на ниво од 150,60 јени.
Притисокот врз доларот се засили откако претседателот Доналд Трамп најави нов бран високи царини за кинескиот увоз — дури 100 проценти — со важност од 1 ноември. Мерките доаѓаат поради ограничувањата на Кина за извоз на ретки минерали, што дополнително ги влоши трговските односи. Кина најави контрамерки, иако реториката од двете страни во последните денови се ублажува.
Дополнителен притисок врз доларот дојде од внатрешниот финансиски сектор — појавија се знаци на нестабилност кај регионалните банки во САД, што ја намали довербата на инвеститорите.
Пазарите сега очекуваат Федералните резерви (ФЕД) да ги намалат каматните стапки уште најмалку двапати до крајот на годината, по веќе спроведеното септемвриско намалување. Причината е релативната слабост на американскиот пазар на труд и забавувањето на економскиот раст. Ова доведе до намалување на разликата меѓу каматните стапки во САД и еврозоната.
Од европска страна, еврото доби дополнителна стабилност по делумното решавање на политичката криза во Франција, предизвикана од неочекуваната оставка на владата. Веста придонесе за зголемена доверба на инвеститорите во зајакнување на стабилноста во еврозоната.
